Comezamos un novo curso poñendo en marcha o servizo de préstamo da nosa biblioteca escolar, unha iniciativa coa que queremos achegar os libros ao alumnado e seguir fomentando o gusto pola lectura en todas as etapas educativas.
Desde Primaria ata Secundaria, o alumnado poderá escoller entre os fondos dispoñibles na biblioteca aqueles títulos que máis se adapten aos seus gustos e intereses. Así, cada alumno e alumna poderá levar os libros en préstamo e continuar a súa lectura tanto dentro como fóra do centro.
Esta iniciativa está directamente relacionada co PLEA (Plan de Lectura, Escritura e Acceso á Información) e, de maneira especial, coa Hora de Ler, un tempo diario pensado para favorecer o hábito lector. Grazas ao servizo de préstamo, cada estudante poderá escoller a súa propia lectura, dispoñer dun exemplar e aproveitar ese momento de forma autónoma e persoal.
Queremos que a biblioteca sexa un espazo vivo, accesible e próximo, no que cada lector e lectora poida descubrir novas historias, ampliar os seus intereses e atopar libros cos que desfrutar da lectura.
Ao longo do curso seguiremos ampliando e diversificando os fondos da biblioteca e propoñendo diferentes actividades para achegar os libros ao alumnado e facer da lectura unha experiencia habitual, enriquecedora e agradable.
A biblioteca abre as súas portas a un novo curso cheo de historias por descubrir. Escolle un libro, lévao contigo e déixate levar pola lectura.
Ningún comentario:
Publicar un comentario