O alumnado de 3º da ESO foron á biblioteca para aprender xogando. Nesta ocasión, no club de xogos da biblioteca do colexio, desfrutaron dunha sesión especial onde, a través do xogo, reforzaron os seus coñecementos e habilidades. Durante a xornada, participaron en diferentes xogos educativos que fomentaron o pensamento estratéxico, a creatividade e o traballo en equipo.
Os xogos aos que xogaron foron:
• A noite do meigallo, onde tiveron que resolver adiviñas para conseguir ingredientes máxicos que lles permitisen conxurar os astros. Unha vez reunidos tres elementos, conseguían a vitoria. Trátase dun sinxelo xogo de taboleiro no que poñer a proba as dotes adiviñatorias.
• Natureza no Camiño de Santiago, un divertido xogo de memoria para coñecer mellor a flora e a fauna de Galicia. Sabes o que é unha lontra? Serías quen de identificar a follaxe dun bidueiro? A través deste xogo, os alumnos exploraron a biodiversidade galega dun xeito entretido.
• Xeometrías, un xogo no que, por quendas, os participantes van colocando fichas para formar cadrados da mesma cort, obtendo puntos en función da cantidade de cadrados creados en cada xogada. Unha proposta que favorece a concentración e o recoñecemento das formas.
• Verbateca, un xogo baseado en materiais empregados en terapias visuais, que axuda a mellorar a vista, a concentración e a comprensión lectora.
Encántannos estes xogos porque están deseñados e fabricados artesanalmente en Galicia, mesturando sempre o lúdico co educativo. A través do xogo, traballamos o razoamento e a reflexión, melloramos a comprensión lectora e potenciamos a capacidade de análise.
Foi unha experiencia enriquecedora e divertida, onde aprender e xogar foron da man!
